འགན་འཛིན་དང་སློབ་དཔོན།

༄༅། །ཞིང་གཤེགས་དབུ་དགེ་དམ་པ་བློ་བཟང་རྒྱ་མཚོ་མཆོག་ནི། ཕྱི་ལོ་ ༡༩༢༨ ལོར་བོད་མདོ་ཁམས་ཀོང་རའི་ཡུལ་དུ་འཁྲུངས། དགུང་ལོ་ ༡༣ ཐོག་ཀོང་ར་དོན་གྲུབ་གླིང་དགོན་པར་ཆོས་ཞུགས་གནང༌། དགུང་ལོ་ ༡༨ ཐོག་དབུས་ཀྱི་གདན་ས་འབྲས་སྤུངས་སུ་ཕེབས་ཏེ་གཞུང་ཆེན་སློབ་གཉེར་གནད་སྨིན་དང་ཞར་དུ་ཁང་ཚན་དགེ་རྒན་སོགས་གནང་། ཕྱི་ལོ་ ༡༩༥༩ ལོར་རྒྱ་གར་དུ་བཙན་བྱོལ་དུ་ཕེབས་ཏེ་སྦག་ས་ཆོས་སྒར་དུ་སློབ་གཉེར་མུ་མཐུད་གནང༌། ཕྱི་ལོ ༡༩༦༤ ལོར་དགེ་རྒན་འོས་སྦྱོང་གནང་། ཕྱི་ལོ་ ༡༩༦༥ ལོ་ནས་མ་སུ་རིར་བོད་དགེ་དང་ཆོས་དགེ་གཅིག་ལྕོགས་ཀྱི་ཐུགས་འགན་བཞེས། སྤྱི་ནོར་༸གོང་ས་ྋསྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་བཞིན་ཕྱི་ལོ་ ༡༩༧༣ ནས་ ཕྱི་ལོ་ ༡༩༩༧ བར་རིགས་ལམ་སློབ་གཉེར་ཁང་གི་དབུ་དགེ་གཅིག་ལྕོགས་ཀྱི་ཐུགས་འགན་རྐང་བཞེས་གནང།  ཕྱི་ལོ་ ༡༩༩༧ ཟླ་བ་ ༢ ཚེས་ ༤ ཉིན་གྱི་དགོང་དྲོའི་ཆུ་ཚོད་ ༧ ནས་ ༨ པའི་མཚམས་སུ་དོལ་རྒྱལ་ལ་བློ་སྙིང་བྲང་གསུམ་གཏད་པའི་མིའི་གཟུགས་ལ་སྲིན་པོའི་སེམས་ཁམས་ཅན་སྐོར་ཞིག་གིས་སྐུ་སྲོག་བཀྲོངས།

༄༅། །ཞིང་གཤེགས་དགེ་བཤེས་དམ་ཆོས་རྒྱལ་མཚན་མཆོག་ནི། ཕྱི་ལོ་ ༡༩༣༤ ལོར་མདོ་ཁམས་གོ་བོ་རོང་པའི་གོང་བ་རུ་འཁྲུངས། དགུང་ལོ་ལྔའི་ཐོག་གཞིས་དགོན་ཐུབ་བསྟན་ཉི་ཤར་གླིང་དུ་ཆོས་ཞུགས་མཛད་དེ་གསང་བདེ་འཇིགས་གསུམ་སོགས་ཐུགས་འཛིན་དང་ཆོ་ག་ཕྱག་ལེན་རིམ་པར་གནང་། ཕྱི་ལོ་ ༡༩༥༢ ལོར་ལྷ་ལྡན་དུ་ཞབས་སོར་བཀོད་དེ་གདན་ས་འབྲས་སྤུངས་སུ་གཞུང་ཆེན་སློབ་གཉེར་གནང་འགོ་ཚུགས། ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་ནས་སྔར་གྱི་སློབ་གཉེར་མཇུག་སྐྱོང་མཛད། ཕྱི་ལོ་ ༡༩༧༩ ལོར་དགེ་བཤེས་ལྷ་རམས་པའི་གྲྭ་སྐོར་མཛད་དེ་མཁས་པའི་སྙན་པ་འབར། ཕྱི་ལོ་ ༡༩༨༠ ལོར་རིགས་སློབ་ཏུ་གཞུང་ཆེན་དཔེ་ཁྲིད་དགེ་རྒན་དུ་ཕེབས། ཕྱི་ལོ་ ༡༩༩༧ ཟླ་བ་ ༤ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རིགས་སློབ་མ་ལག་གི་སྤྱི་ཁྱབ་འགན་འཛིན་དུ་བསྐོ་གཞག་བཀའ་དྲིན་སྩལ་བ་བཞིན་དབུ་དགེ་གཅིག་ལྕོགས་ཀྱི་ཐུགས་འགན་བཞེས། ཕྱི་ལོ་ ༢༠༠༡༣ ལོར་རིགས་སློབ་འཛིན་སྐྱོང་ལྷན་ཚོགས་ནས་རིགས་སློབ་ཀྱི་མཁན་པོར་བསྐོ་བཞག་གནང་། ཕྱི་ལོ་ ༢༠༡༧ ལོར་ལྷོ་ཕྱོགས་འབྲས་སྤུངས་སུ་དགོངས་པ་རྫོགས།

༄༅། །ཞིང་གཤེགས་དགེ་བཤེས་བྱང་ཆུབ་ཚུལ་ཁྲིམས་མཆོག་ནི། བོད་ལྗོངས་ལྷོ་ཁར་སྐུ་འཁྲུངས། དཔལ་ལྡན་འབྲས་སྤུངས་བློ་གསལ་གླིང་དུ་ཆོས་སྒོར་བཞུགས་ཏེ་ཐོས་བསམ་སློབ་གཉེར་གནང་། དེ་རྗེས་རྒྱ་གར་དུ་བཙན་བྱོལ་ལ་ཕེབས་ཏེ་སྦག་ས་ཆོས་སྒར་དུ་གསན་བསམ་མུ་མཐུད་གནང་། ཝཱ་ར་ཎ་སིར་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་སློབ་གཉེར་གནང་སྟེ་ཨཙརྱའི་ཕྱག་ཁྱེར་བཞེས། དེ་ནས་མུ་མཐུད་མོན་གྷོ་བློ་གླིང་གྲྭ་ཚང་དུ་ཕེབས་ཏེ་དགེ་བཤེས་ལྷ་རམས་པའི་མཚན་གནས་ཞེས། ཕྱི་ལོ་ ༡༩༧༥ ལོར་རིགས་སློབ་ཏུ་གཞུང་ཆེན་དཔེ་ཁྲིད་དགེ་རྒན་དུ་ཕེབས། ཕྱི་ལོ་ ༡༩༧༩ ཟླ་བ་ ༢ ནང་རིགས་སློབ་ནས་དགོངས་ཁྲོལ་ཞུས་ཐོབ་བྱུང་བ་བཞིན་ལ་དྭགས་མཚན་ཉིད་སློབ་གྲྭར་དགེ་རྒན་དུ་ཕེབས། ཕྱི་ལོ་ ༡༩༩༧ ལོར་སླར་ཡང་རིགས་སློབ་ཏུ་གཞུང་ཆེན་དཔེ་ཁྲིད་དགེ་རྒན་དུ་ཕེབས། ཕྱི་ལོ་ ༢༠༠༡ རྒྱལ་བའི་ཕོ་བྲང་དུ་འཇིགས་བྱེད་དཔའ་བོ་གཅིག་པའི་བསྙེན་ཆེན་དུ་བཞུགས་པའི་སྐབས་ཤིག་༸གོང་ས་མཆོག་དངོས་སུ་མཚམས་ཁང་དུ་ཕེབས་ཏེ་ཁོང་ཉིད་ལ་འཇམ་དབྱངས་ཞི་ཁྲོ་སྦྲགས་སྒྲུབ་ཀྱི་མན་ངག་ཐུན་མོང་མིན་པ་དག་དགྱེས་བཞིན་སྩལ། དེ་རྗེས་དཔལ་རྒྱལ་དབང་ཀརྨ་པའི་ཐུགས་དགོངས་བཞིན་ཁོང་ལ་རྗེའི་གསུང་ལེགས་བཤད་སྙིང་པོ་དང་། སྔགས་རིམ་ཆེན་མོ་སོགས་ཀྱི་བཀའ་ཁྲིད་མཛད་བཞིན་པའི་སྐབས་ཕྱི་ལོ་ ༢༠༠༦ ལོར་དགོངས་པ་ཆོས་དབྱིངས་སུ་ཐིམས་ཏེ་ཐུགས་དམ་དུ་ཉིན་བདུན་རིང་བཞུགས་པ་བཅས་སོ༎

༥༽ དགེ་བཤེས་རྒྱ་མཚོ་ལགས།

༄༅། །དགེ་བཤེས་རྒྱ་མཚོ་ལགས་ནི། ཕྱི་ལོ་ ༡༩༥༣ ལོར་འཁྲུངས། བོད་གཞུང་གཏན་སློབ་ཁང་ནས་གཞི་རིམ་འཛིན་གྲྭ་བཅུ་གཅིག་ཐོན། ཕྱི་ལོ་ ༡༩༧༣ ལོར་རིགས་སློབ་ཏུ་ཐོག་མའི་སློབ་གཉེར་བའི་ཁོངས་སུ་འཛུལ་ཞུགས་གནང་ཏེ་བློ་རྟགས་བསྡུས་གསུམ་དང་ཕར་ཕྱིན། དབུ་མ། རྣམ་འགྲེལ་བཅས་ལ་ཐོས་བསམ་གནང་སྟེ་ཕྱི་ལོ་ ༡༩༨༣ ལོར་དབུ་མ་རབ་འབྱམས་པའི་ཕྱག་ཁྱེར་བཞེས། དེ་རྗེས་ལོ་ངོ་གསུམ་ཙམ་རིང་། བྱམས་ཆོས་ལྡེ་ལྔ་དང་། མཛོད་འདུལ་སོགས་ལ་ཐོས་བསམ་སློབ་གཉེར་གནང༌། ཕྱི་ལོ་ ༡༩༨༧ ལོར་རིགས་ལམ་སློབ་གཉེར་ཁང་གི་རིགས་གནས་དང་གཞུང་ཆེན་སློབ་དཔོན་གཞོན་པ་གནང༌། ཕྱི་ལོ་ ༡༩༩༡ ལོར་དཔལ་ལྡན་འབྲས་སྤུངས་བློ་གསལ་གླིང་ནས་དགེ་བཤེས་ཀྱི་ཕྱག་ཁྱེར་བཞེས། ཕྱི་ལོ་ ༢༠༡༣ ལོར་གཙུག་ལག་སློབ་དཔོན་དུ་བསྐོ་བཞག་གནང༌། ཕྱི་ལོ་ ༢༠༡༧ ཟླ་བ་ ༡༢ ཚེས་ ༣༡ ཉིན་ཏེ་ལོ་ངོ་ ༣༡ རིང་རིགས་ལམ་སློབ་གཉེར་ཁང་དུ་ཞབས་འདེགས་ཞུས། ཕྱི་ལོ་ ༢༠༡༨ ལོར་བགྲེས་ཡོལ་དུ་ཕེབས། ད་ལྟ་རིགས་སློབ་བགྲེས་ཡོལ་ཁང་དུ་བཞུགས་མུས་ལགས།

༦༽ དགེ་བཤེས་བློ་བཟང་ཟླ་བ་ལགས།

༄༅། །དགེ་བཤེས་བློ་བཟང་ཟླ་བ་ལགས་ནི། ཕྱི་ལོ་ ༡༩༧༡ ལོར་འཁྲུངས། ཕྱི་ལོ་ ༡༩༨༥ ལོར་རིགས་ལམ་སློབ་གཉེར་ཁང་དུ་ འཛུལ་ཞུགས་གནང་སྟེ་གཞུང་ཆེན་ཁག་ལ་ཐོས་བསམ་སློབ་གཉེར་གནང་མཐར་ཕྱི་ལོ་ ༡༩༩༥ ལོར་དབུ་མ་རབ་འབྱམས་པ་ ལེགས་པར་ཐོན། ཕྱི་ལོ་ ༡༩༩༧ ཟླ་བ་ ༣ ཚེས་ ༡ ཉིན་རིགས་སློབ་ཏུ་བརྡ་སྤྲོད་དང་གཞུང་ཆེན་དཔེ་ཁྲིད་དགེ་རྒན་གྱི་ཐུགས་འགན་བཞེས། ཞོར་དུ་ལྷོ་ཕྱོགས་དཔལ་ལྡན་འབྲས་སྤུངས་བློ་གླིང་གྲྭ་ཚང་དུ་དགེ་བཤེས་དམ་འཇོག་ཀྱང་གནང༌། ཕྱི་ལོ་ ༢༠༠༢ ཟླ་བ་ ༥ ཚེས་ ༡༩ ཉིན་རིགས་ལམ་སློབ་གཉེར་ཁང་གི་ཤེས་ཡོན་འགན་འཛིན་དུ་བསྐོ་བཞག་གནང་། ཕྱི་ལོ་༢༠༡༧ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་འབྲེལ་ལྟར་རིགས་སློབ་ནས་བགྲེས་ཡོལ་དུ་ཕེབས་ཏེ་བལ་ཡུལ་མི་མང་ནང་ཆོས་ངོ་སྤྲོད་ཚོགས་པའི་ཚོགས་གཙོའི་ཐུགས་འགན་བཞེས་མུས་ཡིན།

༄༅། །དགེ་བཤེས་དཀོན་མཆོག་དབང་འདུས་ལགས་ནི། ཕྱི་ལོ་ ༢༠༠༧ ཕྱི་ཟླ་ ༣ ཚེས་ ༡ ཉིན་རིགས་ལམ་སློབ་གཉེར་ཁང་གི་སློབ་དཔོན་བགྲེས་པའི་མཚན་གནས་སུ་བསྐོ་བཞག་གནང་། ཕྱི་ལོ་ ༢༠༡༠ ལོར་རིགས་སློབ་ནས་དགོངས་ཁྲོལ་ཐོབ།

༄༅། །སློབ་ཟུར་རིས་མེད་དགེ་བཤེས་བསྟན་འཛིན་འགྱུར་མེད་ལགས་ནི། ཕྱི་ལོ་ ༡༩༩༤ ལོར་རིགས་ལམ་སློབ་གཉེར་ཁང་དུ་འཛུལ་ཞུགས་གནང་སྟེ་འགོ་བསྡུས་གྲྭ་ནས་མཇུག་གསང་སྔགས་བར་གྱི་གཞུང་ཆེན་ཁག་ལ་ཐོས་བསམ་སློབ་གཉེར་དཔྱིས་ཕྱིན་པ་གནང་། ཕྱི་ལོ་ ༢༠༠༩ ལོར་རིས་མེད་དགེ་བཤེས་ཐོན་དང་པོའི་ཕྱག་ཁྱེར་བཞེས། ཕྱི་ལོ་ ༢༠༡༠ ཟླ་བ་ ༣ ཚེས་ ༡༢ ཉིན་རིགས་ལམ་སློབ་གཉེར་ཁང་གི་གཞུང་ཆེན་དཔེ་ཁྲིད་སློབ་དཔོན་དུ་བསྐོ་བཞག་གནང་། ཕྱི་ལོ་ ༢༠༡༧ ལོར་སྐུ་གཟུགས་བདེ་མིན་གྱིས་རིགས་སློབ་ནས་དགོངས་ཁྲོལ་ཐོབ།

༄༅། །དགེ་བཤེས་བསམ་གཏན་རྒྱ་མཚོ་མཆོག་ནི། ཕྱི་ལོ་ ༡༩༨༢ ལོར་བཞུགས་སྒར་རིགས་ལམ་གཉེར་ཁང་དུ་འཛུལ་ཞུགས་ཀྱིས་མི་ལོ་བཅུ་གཅིག་ལྷག་གི་རིང་གཞུང་ཆེན་ལ་ཐོས་བསམ་སློབ་གཉེར་གནང་། ཕྱི་ལོ་༡༩༩༤ ལོར་དགེ་རྒན་འོས་སྦྱོང་སྐབས་གཉིས་པའི་དགེ་རྒན་གནང་། ཕྱི་ལོ་ ༡༩༩༥ ལོར་དབུ་དགེ་དམ་པ་མཆོག་ནས་ས་རཱ་མཐོ་སློབ་ཀྱི་སློབ་སྤྱིའི་ཐུགས་འགན་བཞེས་དགོས་པའི་བཀའ་གནང་བ་བཞིན་ལོ་གཅིག་དང་ཕྱེད་རིང་ས་རཱ་མཐོ་སློབ་ཀྱི་སློབ་སྤྱིའི་ཐུགས་འགན་བཞེས། ཕྱི་ལོ་ ༡༩༩༦ ལོར་དབུ་དགེ་དམ་པའི་དགོངས་ཁྲོལ་བཞིན་ལྷོ་ཕྱོགས་སུ་ཕེབས་ཏེ་དཔལ་ལྡན་འབྲས་སྤུངས་སྒོ་མང་གྲྭ་ཚང་གི་ཆོས་སྒོར་ཞུགས། ཕྱི་ལོ་ ༢༠༠༤ ལོར་དགེ་བཤེས་ལྷ་རམས་པའི་མཚན་གནས་བཞེས། ཕྱི་ལོ་ ༢༠༠༥ ལོར་དཔལ་ལྡན་སྨད་རྒྱུད་གྲྭ་ཚང་གི་ཆོས་སྒོར་ཞུགས་ཏེ་ལོ་གཅིག་རིང་གསང་སྔགས་ཀྱི་གཞུང་ཆེན་ཁག་ལ་ཐོས་བསམ་སློབ་གཉེར་བགྱིས་ཏེ་སྔགས་རམས་པའི་མཚན་གནས་བཞེས། ཕྱི་ལོ་ ༢༠༠༦ ནས་ལོ་འགའི་རིང་དད་ལྡན་འགའ་ཞིག་གི་རེ་བསྐུར་ལྟར་དབྱིན་ཡུལ་དང་ལྷོ་ཨ་ཧྥི་རི་ཀ་སོགས་ཡུལ་གྲུ་འགའ་ལ་ཕེབས་ཏེ་ནང་ཆོས་ངོ་སྤྲོད་གནང༌། ཕྱི་ལོ་ ༢༠༡༠ ལོར་དཔལ་ལྡན་འབྲས་སྤུངས་སྒོ་མང་གྲྭ་ཚང་གི་དགེ་འདུན་དམངས་ཀྱིས་འོས་ཤོག་གི་ལམ་ནས་གྲྭ་ཚང་རིན་པོ་ཆེའི་འཛིན་སྐྱོང་ཁང་གི་ཕྱག་མཛོད་རྒན་པར་འདེམས་བསྐོ་གནང་བ་བཞིན་ལོ་ངོ་གསུམ་གྱི་རིང་ཐུགས་འགན་བཞེས། ཕྱི་ལོ་ ༢༠༡༦ ལོར་སླར་ཡང་མ་འོངས་འཛིན་སྐྱོང་ཁང་གི་འགན་འཛིན་དུ་འདེབས་བསྐོ་གནང་བ་ལྟར་ལོ་ངོ་གསུམ་རིང་ལྷག་བསམ་ཟོལ་མེད་ཀྱི་ཐོག་ནས་ཐུགས་འགན་བཞེས། ཕྱི་ལོ་ ༢༠༡༨ ཟླ་བ་ ༩ ཚེས་ ༣༠ ཉིན་རིགས་སློབ་འགན་འཛིན་ལྷན་ཚོགས་ནས་རེ་བསྐུལ་ཞུས་པ་བཞིན་རིགས་སློབ་མ་ལག་གི་སྤྱི་ཁྱབ་འགན་འཛིན་གྱི་ཐུགས་འགན་བཞེས་མུས་ཡིན།

༄༅། །དགེ་བཤེས་བློ་ཡངས་ལགས་ནི། ཕྱི་ལོ་ ༡༩༦༧ ཟླ་བ་ ༡ ཚེས་ ༡༥ ཉིན་ཏྲེ་ཧོར་ལྕག་རི་སྒོ་ར་གྲོང་དུ་འཁྲུངས། རང་ལོ་བཅོ་བརྒྱད་སྐབས་གཞིས་དགོན་ལྕོག་རི་དགོན་དུ་ཆོས་ཞུགས་གནང་། དགུང་ལོ་བཅོ་བརྒྱད་ནས་ཉེར་གཉིས་བར་དཀར་མཛེས་དགོན་པའི་མཁན་ཟུར་རྒན་བློ་བཟང་འཇམ་དབྱངས་ཀྱི་དྲུང་ནས་མཚན་ཉིད་ཀྱི་གཞུང་ལ་ཐོག་མར་སློབ་གཉེར་གནང་། ཕྱི་ལོ་༡༩༨༨ རང་ལོ་ཉེར་གཉིས་སྐབས་རྒྱ་གར་འཕགས་པའི་ཡུལ་དུ་བཙན་བྱོལ་ལ་ཕེབས་ཏེ། རྒྱ་གར་ལྷོ་ཕྱོགས་མོན་གྷོ་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་གི་སྒྲིག་ཁོངས་སུ་ཞུགས། ཕྱི་ལོ་ ༢༠༠༧ ལོར་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་མཐར་ཕྱིན་ཏེ་དགེ་བཤེས་ལྷ་རམས་པའི་མཚན་གནས་བཞེས། ཕྱི་ལོ་ ༢༠༠༨ ལོར་དཔལ་ལྡན་སྨད་རྒྱུད་གྲྭ་ཚང་དུ་ཆོས་ཞུགས་ཀྱིས་གསང་སྔགས་ཀྱི་གཞུང་ཆེན་ཁག་ལ་ཐོས་བསམ་སློབ་གཉེར་གནང་སྟེ་དགེ་བཤེས་སྔགས་རམས་པའི་མཚན་གནས་ཐོབ། ཕྱི་ལོ་ ༢༠༡༠ ཟླ་བ་ ༥ ཚེས་ ༢༠ ཉིན་བཞུགས་སྒར་རིགས་ལམ་སློབ་གཉེར་ཁང་དུ་གཞུང་ཆེན་དཔེ་ཁྲེད་དགེ་རྒན་དུ་ཕེབས། ད་ལྟའང་འདི་ག་རིགས་ལམ་སློབ་གཉེར་ཁང་དུ་སློབ་དཔོན་བགྲེས་པའི་མཚན་གནས་ཐོག་སློབ་ཁྲིད་གནང་མུས་ཡིན།

༄༅། །དགེ་བཤེས་རྒྱལ་མཚན་དབང་འདུས་ལགས་ནི། ཕྱི་ལོ་ ༡༩༨༨ ལོར་རྒྱ་གར་དུ་ཕེབས་ཏེ་དགའ་ལྡན་ཤར་རྩེ་གྲྭ་ཚང་དུ་ཆོས་སྒོར་ཞུགས། ཕྱི་ལོ་ ༡༩༩༡ ལོར་༸གོང་ས་༸རྒྱལ་དབང་ཡིད་བཞིན་ནོར་བུའི་ཞལ་སྔ་ནས་བསྙེན་རྫོགས་བསྒྲུབ་རྒྱུའི་སྐལ་བཟང་ཐོབ། དགའ་ལྡན་ཤར་རྩེ་གྲྭ་ཚང་དུ་ལོ་ངོ་བཅོ་ལྔ་རིང་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་ལེགས་པར་གནང་སྟེ་དགེ་ལུགས་རྒྱུགས་སྤྲོད་དུ་ལོ་དྲུག་རིང་མཉམ་ཞུགས་གནང༌། ཕྱི་ལོ་ ༢༠༡༠ ལོར་གནས་མཆོག་རྡོ་རྗེ་གདན་དུ་སྨོན་ལམ་འཕར་མའི་སྐབས་དགེ་བཤེས་ལྷ་རམས་པའི་དམ་འཇོག་གི་སྐལ་བཟང་ཐོབ། ཕྱི་ལོ་ ༢༠༡༡ ལོར་དཔལ་ལྡན་སྟོད་རྒྱུད་གྲྭ་ཚང་དུ་ལོ་གཅིག་རིང་ཆོས་ཐོག་འགྲིམས་ཏེ་དགེ་བཤེས་སྔགས་རམས་པའི་མཚན་གནས་བཞེས། དེ་རྗེས་ལོ་ཤས་རིང་གྲྭ་ཚང་གི་སློབ་གཉེར་ལྷན་ཚོགས་དང༌། སློབ་གྲྭ། ཚན་རིག་ལྟེ་གནས་ཁང་བཅས་སུ་རྒྱུན་ལས་དང་སློབ་སྤྱི་འགན་འཛིན་བཅས་ཀྱི་ཐུགས་འགན་བཞེས་ཤིང་ཞར་ལ་འབྲེལ་ཡོད་རྣམས་ལ་སློབ་ཁྲིད་གང་ཐུབ་ཀྱང་གནང༌། ཕྱི་ལོ་ ༢༠༡༤ ལོར་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་གོ་སྒྲིག་གནང་བའི་གཞུང་ཆེན་རིགས་གཅིག་རྐང་འཛིན་གྱི་ལས་རིམ་ལ་ཞུགས་ཏེ་ལོ་ངོ་བཞིའི་རྗེས་དབུ་མའི་རིགས་གཅིག་རྐང་འཛིན་གྱི་ཉམས་ཞིབ་པའི་ཕྱག་འཁྱེར་ཐོབ། ཕྱི་ལོ་ ༢༠༡༦ ལོ་ནས་བཟུང་རིགས་ལམ་སློབ་གཉེར་ཁང་དུ་གཞུང་ཆེན་དཔེ་ཁྲིད་སློབ་དཔོན་གྱི་ཐུགས་འགན་བཞེས་མུས་ཡིན།

༄༅། །དགེ་བཤེས་བསོད་ནམས་ཆོས་རྒྱལ་ལགས་ནི། ཕྱི་ལོ་ ༡༩༧༢ ལོར་གཙང་ཁ་ཞེས་པའི་གྲོང་ཚོར་འཁྲུངས། དགུང་ལོ་བརྒྱད་ཀྱི་སྐབས་ནས་བཟུང་ལོ་ངོ་གསུམ་ཙམ་རིང་གྲོང་ཚོའི་སློབ་ཆུང་དུ་བསྐྱོད། རང་ལོ་བཅོ་ལྔ་ཙམ་གྱི་བར་ཕ་སངས་རྒྱས་རྒྱ་མཚོའི་དྲུང་ནས་བོད་ཡིག་འབྲི་ཀློག་ལ་སློབ་སྦྱོང་གནང༌། ཕྱི་ལོ་ ༡༩༨༧ ལོར་དཀར་མཛེས་དགོན་དུ་ཆོས་ཞུགས་གནང་སྟེ་ལོ་ངོ་བཞི་ཙམ་རིང་མཚན་ཉིད་ཀྱི་གཞུང་ལ་སློབ་གཉེར་གནང༌། ཕྱི་ལོ་ ༡༩༩༠ ལོ་མཇུག་ཏུ་རྒྱ་གར་དུ་ཕེབས་ཏེ་ཝ་ར་ཎ་སིར་སྤྱི་ནོར་༸གོང་ས་ྋསྐྱབས་མགོན་ཆེན་པོ་མཆོག་གི་དྲུང་ནས་དཔལ་དུས་ཀྱི་འཁོར་ལོའི་དབང་ཆེན་ཞུ་རྒྱུའི་སྐལ་བཟང་གི་གོ་སྐབས་ཐོབ། དེ་རྗེས་རྒྱ་གར་ལྷོ་ཕྱོགས་མོན་གྷོར་ཕེབས་ཏེ་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་དུ་ཆོས་ཞུགས་གནང༌། ཕྱི་ལོ་ ༢༠༠༧ ལོར་དགེ་ལྡན་རྒྱུགས་སྤྲོད་ཆེ་མོར་ཞུགས། ཕྱི་ལོ་ ༢༠༡༣ ཟླ་བ་ ༡ ནང་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་མཐར་ཕྱིན་ཏེ་དགེ་བཤེས་ལྷ་རམས་པའི་མཚན་གནས་བཞེས། ཕྱི་ལོ་ ༢༠༡༣ ཟླ་བ་ ༢ ནང་དཔལ་ལྡན་སྨད་རྒྱུད་གྲྭ་ཚང་དུ་ཆོས་ཞུགས་ཀྱིས་གསང་སྔགས་ཀྱི་གཞུང་ཆེན་ཁག་ལ་ཐོས་བསམ་སློབ་གཉེར་གནང་སྟེ་དགེ་བཤེས་སྔགས་རམས་པའི་མཚན་གནས་བཞེས། ཕྱི་ལོ་ ༢༠༡༤ ནས་ལོ་གཅིག་རིང་གྲྭ་ཚང་གི་རྒྱུགས་སྤྲོད་དོ་དམ་པ་གནང༌། ཕྱི་ལོ་ ༢༠༡༧ ཟླ་བ་ ༣ ཚེས་ ༡ ཉིན་བཞུགས་སྒར་རིགས་ལམ་སློབ་གཉེར་ཁང་དུ་ཕེབས་ཏེ་གཞུང་ཆེན་དཔེ་ཁྲིད་སློབ་དཔོན་གྱི་ཐུགས་འགན་བཞེས་མུས་ཡིན།

༄༅། །དགེ་བཤེས་རིན་ཆེན་བསྟན་འཛིན་ལགས་ནི། ཕྱི་ལོ་ ༡༩༧༡ ལོར་ཁམས་ཏྲེ་ཧོར་དར་རྒྱས་ལྷ་གཉིས་ངེས་གྲོང་ཚོར་འཁྲུངས། ཕྱི་ལོ་ ༡༩༩༡ ལོར་རྒྱ་གར་ལ་བཙན་བྱོལ་དུ་ཕེབས་ཏེ་ལྷོ་ཕྱོགས་མོན་གྷོ་དཔལ་ལྡན་འབྲས་སྤུངས་བློ་གླིང་གྲྭ་ཚང་དུ་ཆོས་ཞུགས་གནང༌། ཕྱི་ལོ་ ༢༠༠༨ ལོར་དགེ་ལུགས་རྒྱུགས་སྤྲོད་དུ་ཞུགས། ཕྱི་ལོ་ ༢༠༡༤ ལོར་གཞུང་ཆེན་བཀའ་པོད་ལྔ་ལ་གསན་བསམ་སློབ་གཉེར་མཐར་ཕྱིན་ཏེ་དགེ་བཤེས་ལྷ་རམས་པའི་མཚན་གནས་བཞེས། ཕྱི་ལོ་ ༢༠༡༥ དཔལ་ལྡན་སྨད་རྒྱུད་གྲྭ་ཚང་དུ་ཆོས་ཞུགས་ཀྱིས་གསང་སྔགས་ཀྱི་གཞུང་ཆེན་ཁག་ལ་གསན་བསམ་སློབ་གཉེར་ལེགས་པར་གནང་སྟེ་དགེ་བཤེས་སྔགས་རམས་པའི་མཚན་གནས་ཐོབ། ཕྱི་ལོ་ ༢༠༡༦ ནས་ལོ་གཅིག་རིང་དཔལ་ལྡན་བློ་གླིང་གྲྭ་ཚང་གི་རྒྱུགས་སྤྲོད་དོ་དམ་པའི་ཕྱག་ལས་གནང༌། ཕྱི་ལོ་ ༢༠༡༧ ཟླ་བ་ ༥ ཚེས་ ༨ ཉིན་ཞུགས་སྒར་རིགས་ལམ་སློབ་གཉེར་ཁང་གི་གཞུང་ཆེན་དཔེ་ཁྲིད་སློབ་དཔོན་དུ་ཕེབས་པ་བཞིན་གཞུང་ཆེན་སློབ་ཁྲིད་གནང་མུས་ཡིན།

༄༅། །རིས་མེད་དགེ་བཤེས་ཁམས་བཟང་ལགས་ནི། ཕྱི་ལོ་ ༡༩༨༦ ལོར་བོད་ཀྱི་དབུས་ཁུལ་མལ་གྲོ་གུང་དཀར་རྫོང་རྩེ་ཞོལ་ཤང་གད་ཧོར་གྲོང་ཚོར་འཁྲུངས། དགུང་ལོ་བདུན་ལ་སོན་སྐབས་གྲོང་ཚོའི་གཞུང་བཙུགས་སློབ་གྲྭར་སློབ་ཞུགས་ཀྱིས་ལོ་རིམ་གསུམ་པ་བར་སྦྱང་པ་གནང་། ཕྱི་ལོ་ ༡༩༩༧ ལོར་ལྷ་ལྡན་རྨེ་རུ་ཕུན་ཚོགས་ནོར་གླིང་གྲྭ་ཚང་དུ་ཆོས་ཞུགས་གནང་སྟེ་གཅེན་པོའི་མདུན་ནས་འགོ་སྐྱབས་འགྲོ་ནས་བརྩམས་ཏེ་གྲྭ་ཚང་གི་འདོན་ཆོས་སྤྱོད་ཁག་ལ་སྦྱང་པ་གནང་བ་དང་། དགེ་བའི་བཤེས་གཉེན་རྒན་རྒྱལ་མཚན་བློ་གྲོས་མཆོག་གི་དྲུང་ནས་གཞུང་ཆེན་དཔེ་ཁྲིད་ཞུས།

ཕྱི་ལོ་ ༢༠༠༦ ཟླ་བ་ ༥ ཚེས་ ༡༣ ཉིན་ལྷ་ས་ནས་ཐོན་ཏེ་བལ་བོད་ས་མཚམས་བརྒྱུད་རྒྱ་གར་ལ་བཙལ་བྱོལ་དུ་ཕེབས། ལོ་དེའི་ཕྱི་ཟླ་ ༦ པའི་ནང་སུ་ཇཱ་བོད་ཁྱིམ་དུ་སློབ་ཞུགས་ཀྱིས་ཟླ་ངོ་དགུའི་རིང་བོད་ཀྱི་སྐད་ཡིག་དང་དབྱིན་ཡིག་སོགས་ལ་སློབ་སྦྱོང་གནང་། དེ་རྗེས་ཕྱི་ལོ་ ༢༠༠༧ ལོར་རིགས་ལམ་སློབ་གཉེར་ཁང་དུ་སློབ་ཞུགས་གནང་སྟེ་བློ་རྟགས་བསྡུས་གསུམ་དང་། དབུ་ཕར་ཚད་གསུམ། ད་དུང་རིས་མེད་ཀྱི་བཤེས་གཉེན་དུ་མའི་དྲུང་ནས་བོད་ཀྱི་ཆོས་བརྒྱུད་རིས་མེད་ཀྱི་ལྟ་གྲུབ་ཁག་ལ་སློབ་གཉེར་གནང། གཞུང་ཆེན་སློབ་གཉེར་གྱི་ཞོར་དུ་བོད་ཀྱི་བརྡ་དག་སྙན་གསུམ་ལའང་སྦྱང་པ་གནང་བ་བཅས་ལོ་ངོ་བཅུ་དྲུག་རིང་བསླབ་པ་སློབ་གཉེར་བགྱིས་འབྲས་ཕྱི་ལོ་ ༢༠༢༡ ལོར་བསླབ་པ་མཐར་སོན་གྱིས་རིས་མེད་དགེ་བཤེས་ཆེན་མོའི་མཚན་གནས་བཞེས། ཕྱི་ལོ་ ༢༠༢༢ ནས་བཟུང་རིགས་ལམ་སློབ་གཉེར་ཁང་དུ་གཞུང་ཆེན་དཔེ་ཁྲིད་སློབ་དཔོན་གཞོན་པར་བསྐོ་བཞག་གནང་བ་བཞིན་ཐུགས་འགན་བཞེས་མུས་ཡིན།